بسم الله الرحمن الرحيم
لما شاركت فالفيس بوك وقضيت فترة طويله فيه وبقي عندي فرندز كتير عشان شغل الفريق
حبيت اني اعمل اكونت تاني عشان يبقي خاص باصحابي بس
اللي اعرفهم بس يعني
بغض النظر عن انه ملي ناس برضوه واني معودتش بفتحه كتير
المهم اني لما عملته طلب رقم الموبايل عشان يعمل configuration وحاجات كده
كتبت رقم التليبفون وبعتلي رساله فيها ارقام
بعدها بكتير عرفت من ناس ولكن معلومات غير موثوق فيها اوي ان موضوع رقم التليفون ده حاجة خاصه بالحكومه كده
عشان لو عملت حاجة غلط ولا قولت حاجة يعرفوا يجيبوني علي طول :D
ده كان من زمان اوي
امبارح بقي ناس كانوا بيفتحو اكونت قديم بتاعهم لقوه موقوف وعايز رقم التليفون عشان يبعت رساله عشان يرجعه
ومكتبوش الرقم لأنهم معرفوش يكتبوه فين
اما النهارده انا كنت داخله علي بلوجر وبعمل كومنت علي مدونه هامر راديو
وانا بعمل لوج ان لقيته برضوه بيطلب رقم التليفون عشان يبعت رساله فيها ارقام عشان انشط الحساب تاني
مع اني مش قلباه يعني وبفتحه كل شويه
انا قولت والله ما انا كاتبه رقم وهعمل حساب تاني علي جوجل بس افتكرت مدونتي وانها بالاكونت المقفول ده
قولت ادخل اجرب واودعها
لقيته دخل عادي وقولت اجرب واكتب البوست ده عشان اتأكد
المهم غير كده واني دخلت الحمد لله وكتبت البوست
ان القصه كبيرة اوي وان الموضوع تجسس جامد اوي
فوق كل ده الفيس والمدونة وارقام التليفونات اللي هما عايزنها
لسه قاريه خبر انهم اكتشوف ان شركه ابل بجهازها الاي فون بيبعت صورة من بيانات العملاء للشركه وفوق ده كمان
بيصور مستخدم الموبايل من غير ما يعرف وبيبعت الصورة للشركه
والخبر ده كان جاي علي قناه الجزيرة يعني اعتقد يعتبر ثقه
متزامنا مع كل هذا اخبار منتشره عن ان الحكومة عايزة تقفل الفيس بوك عشان ال ايه الاسرئيلين واعداء الوطن _ طبعا الوطن مقصود بيه الشعب لأنهم حبايب الحكومه ومطبعين معاهم هووووش _
ال ايه بيتجسسوا علي الشباب اللي زي الورد بتاعنا وعايزين يبوظو عقولهم وبيتجسسوا علي بيانتهم وبيستخدموها ضدهم وكلام كبير كده
مما لا شك فيه ان النت ده اصلا عباره عن شبكه تجسس كبيييييييييييره والجامدين فيها _ الناس اللي بره يعني _ هما اللي بياخدو كل المعلومات ومع ذلك اشك ان لو الحكومة قفلت الفيس بوك هيبقي عشان كده
لأن برضوه متزامنا مع الكلام ده النهضه والثوره الكبييييييييره عالفيس والمدونات بسبب خالد سعيد وسميه اشرف والبرادعي واحمد نجم وغيره وغيره بكل ما يبشر او ينذر بحدث عظيم
سواء حلو او وحش
فربنا يستر