بسم الله الرحمن الرحيم
احم احم
من فترة ليست بالبعيده كان فيه ناس سواء في مدونات او في مسلسلات مش متذكره
شبا ب بيقولوا لأهلهم انتو محتاجين تمحوا ثقافتكم الفيس بوكيه
وطبعا كلنا كنا بنضحك علي الجمله دي
لكن دلوقتي وبعد اللي حصل واللي بيحصل
واثبات الفيس بوك انه يقدر يجمع مئات الالاف من الناس للشارع واثبات الفيس بوك انه ممكن يقلب نظام حكم دولة بحالها
بدأت الناس تصدق انهم كان المفروض يمحوا ثقافتهم الفيس بوكيه قبل ما يحصل اللي حصل
ومش عارفه ليه ابتديت اشوف الناس ووسائل الاعلام والجرايد كلها بقت تتابع الفيس بوك والصفحات اللي فيها عدد كبير
ايمانا منها بان هذا الفيس بوك هو منفس لكتير من الشباب
لدرجه ان القوات المسلحه تعمل صفحه ليها عالفيس عشان تقدر تتصل بالشباب الكيوت اللي هما احنا
وتلاقي ناس من الكبار اهالينا تقابلك في الشارع تقولك ها انت من شباب الفيس بوك
علي اساس ان الفيس بوك ده مدينه كبيرة وفيها شوية شباب كده كانوا فاكرينها قبل كده عيال سيس بس طلعوا ناس جامدين اوي
ويا سلام بقي لو حد من الشباب العاديين كان مش بيحب الفيس بوك زمانه دلوقتي زعلان وبيضرب نفسه ميت رصاصه مطاطيه عشان مكانش من شباب الفيس بوك وان كان هذا لا يمنع من ان لو حد سأله بما انه هو شاب اذا كان مش شباب الفيس بوك ولا لأ انه يقوله اه
لكن هو من جواه عارف انه مش من شباب الفيس بوك :D
ابتديت احس ان الناس بدأت تعمل دعوات لتنميه المجتمع ومنها حملات تنضيف الشوارع والمساهمه في البورصة وشرا المنتج المصري وما الي ذلك عن طريق الفيس بوك
علي شاكله من النهارده دي بلدك انتا !
يا سلام
طب وهي قبل كده كانت بلد مين ؟
غلط اوي اللي قال ان الشباب بدأ يتجه لتنميه المجتمع بعد الثورة لكن نقدر نقول ان الشباب بدأ يلتفت للحاجات دي
والمفروض ان الحاجات دي كانت موجودة من زمان
بمعني :
- كان فيه جروبات من زمان اوي اوي بتحاول تشجع المنتج المصري وكانت بتعمل قوائم بالمنتجات المصرية 100% وجودتها عليه
وكانوا عاملين توبيكات مخصوصه لتجارب الناس وانت تخش عالتوبيك تلاقي ناس كاتبه بسكوت بسكو مصر هايل بس ياريت لو يزودوا الشوكولاته شوية وبيبقي بنص جنيه بدل ربع واحنا هندفع برضوه :D
والحقيقه رغم ان طريقة الكلام تضحك لكن ليه لأ ؟ محنا بنتشري التويكس سوا احلي بتلاته جنيه ونص مع ان عندنا الماندولين شبه وبنص جنيه نص
يبقي ليه الماندولين متحاولش تعلي جودتها للتويكس وبدل ما يبقي بنص يبقي بجنيه ونص واهو احنا حتي نوفر 2 جنيه :D
- النوع التاني من التنميه المجتمعيه هو العمل الخيري اللي غير مشروط بجميعه معينه لكنه مجموعه من الشباب عايزين يفيدوا البلد ويساعدوا المحتاجين
النهارده روحت مع مجموعه شباب وبنات زي الفل لمركز الاورام وعدد الناس المتطوعين كان مهووول جدا ما يقارب من 200 واحد بدون مبالغه وطلعت الاظر الفاضيه عشان الناس تتبرع بالفلوس وما شاء الله الفلوس نزلت ترف علي الاظرف
طب مهو يا جماعه فيه ناس بتشتغل عمل خيري عن طريق الفيس بوك من زمان وقبل الثورة دي بسنين يعني مش الثورة اللي دفعتهم لكده
دول ال200 واحد المستجدين هما بس اللي اتغيروا لكن الناس الاساسين او المنظمين كانوا بيعملوا كده من زمان وبيعدوا يهاتوا عشان الناس تعبرهم وكان عدد قليل اوي اللي بيلتفت
----------
دلوقتي يا جماعه بيقولوا الريس الجديد هايبقي من علي الفيس بوك
والحقيقه ان التعبير خانهم لكن الكلمه الصح هي الريس الجديد هيختاروه علي اساس حملته الانتخابيه اللي هايعملها عالفيس بوك
والحقيقه ان الفيس فتح مجال للدعايه الانتخابه المجانيه
ما عليك إلا انك تخش تعمل صفحه رسميه عالفيس باسمك وتكلم الشباب من خلالها وتعرفهم برنامجك
ولأن الموضوع بدأ من دلوقتي وبقينا لاقيين صفحات اسمها ترشيح احمد زويل او عمرو موسي او الجنزوري او البرادعي
وشوفت صفحه بترشح احمد شفيق كمان :D
إلا ان الناس دي لسه مقالتش انهم هيرشحوا نفسهم اصلا ودي بس مساهمات من الناس انها عايزة الناس دي لكن الحقيقة احنا منعرفش اذا كانت الناس دي ناوية تترشح اصلا ولا احنا هنلاقي اسامي تصدمنا
وبما ان الناس اللي هتروح الانتخابات - ده لو الانتخابات جت اصلا - هما الشباب لأن اغلب الشعب مش هينتخب ومالوش دعوة باليله دي ومطرح ما تسري هندقلها
فانا من موقعي هذا بادعو كل الناس اللي هترشح نفسها الانتخابات الجايه سواء رئاسيه او مجالس انهم يدخلوا الفيس بوك في حملتهم الانتخابيه المجانيه اللي هتعمل اثر اكبر من اللافتات اللي بيتصرف عليها فلوس وفي الاخر بتتقلب والله اعلم بيحصل فيها ايه بعد كده
وادعو ايضا كل الناس انها متظلمش الشباب وتقول انهم مابدأوش يشتغلوا ويحبوا بلدهم ويساهموا فيها إلا بعد الثورة
احنا شغالين من زمان والله بس محدش كان معبر !!
